کۆم کوشتەو شەنگاڵی بە ئەرەمەرزنارەو وێراوەبەری جواب دریاوە.

کۆم کوشتەو شەنگاڵی بە ئەرەمەرزنارەو وێراوەبەری جواب دریاوە.

بەیاننامەو پلاتفۆرموو هۆرام-ی بە بۆنەو یەرەمین سالیادوو کۆم کوشتەو شەنگالی .

بە درێژایی تاریخوو نویسیاو گەلەکەیما ، خۆلکوو کوردی جە هەر بەشێ جە نیشتمانەکەیمانە بە جۆرێ کۆم کوشتەیش سەرەرە ئۆمان .جە وەرکەوتوو کوردستانی بە مادە هۆشبەرەکا و قەنارەی ، جەسەرنیشتەنە بە زینانوو و کۆشتی ، جە وەرنیشتەنە بە ئینکار و واستەیۆ و جە پانیشتەنە بە شیمیایی و سۆچنای و ئەنفال . سەرە راو ئی کارەساتە گۆرا ، گەلی کوردی ئیزئیدیما بە بۆنەو مدرامانی پێ ئاستەیۆ شناسنامەو وێشا پسۆ زوانی ، باوری و جیا ناستەی ژیوگەیشا زیاتەر جە ٧٣ جارا بە نائینسانی تەرین جۆرەکا داگیرکەری ، حەرەشێ کریان سەرشا .

هەر جار سەرەراو کۆشتەی هەزاران کوردێ ئیزئیدییە ، بە هەزاران ژەنێ ئیزئیدیە جە لاو داگیرکەراوە بە بۆنەو جیاوازی دین و باوریشاوە پسۆ کۆیڵە و کەنیزێ دەسشا سەرەنە گیریان . سەرەراو کۆشتەی و مال وێرانیشا ، لێرەو و باوریشا مەڕیان ، کەسایەتیشا سووک کریان و ئانە بێ ئێحترامی بۆ جە وەرانوەرشانە کریان . هەم جە لاو فیزیکییەوە و هەم جە لاو رۆحیوە کۆم کوشتەی ئۆمان سەرشارە . تاومێ واچمێ تاریخوو ئیزئیدیەکا ، تاریخێن پەر جە تراژیدیا کە کەمتەر جە پەڵاکا تاریخوو نەتەوەکا تەرینە وینمێش.

ئانە کە فرەتەر تراژیدیا و ئیزئیدیەکا جە تاریخەنە بەر وزۆ ، ئا بەڵگێنێ کە ٣ سالێ چێوەلتەر ، جە وەرانوەروو چەموو گردوو دنیەوە قوولی کۆم کۆشتەی و دەسدرێژی لایانێ پسۆ داعش و داعشەکا تاریخیش نیشانەدا . خۆشبەختانە  ئارۆ  تکنۆلۆژئیا کە دنیاشا کەردێنەوە دەگێوە گۆڵانێ ، بی بە شاهێدە گۆرە پێ گردوو خۆلکوو جیهانی کە راسی کارەساتو شەنگاڵی و ئیزئیدیا بە چەموو وێشا وینا . مشۆم پەرسمێ جە سەردەمێ پسۆ ئارۆینە کە کەم کارەساتێ هەنێ کە شاریاوە ، ٧٢ جارێتەر کە کۆم کۆشتەی سەروو کوردا ئیزیدیرە ئۆمان ، چن و چەنی کۆمەڵگاو ئیزئیدیا دەسدرێژی کریان سەرش و یا کۆم کوشتەی ئۆمان سەرەشارە . ؟

ئارۆ ٣ سالێ سەروو کارەساتوو شەنگاڵیروە گۆزەریۆ . بەلام ئانە کە بی بە یاگێ سەرنجوو گردوو جیهانی ، بڕیاروو رێک وستەی و مەرزنارەو سیستموو وێراوەبەری ئیزئیدیا بە دەسوو ژەنا و جوانا ئیزئیدی بێ کە جە چوارچۆ هێزەکا یەبەشەی و ئیزئیدخانی دمائیشا بە تاریخێ وناڵین و سیاوی ئارد ، کە جە لاو داگیرکەرا کوردستانی و هەر پاسە خەتوو خیانەت و نیشتمان ورەشوو کورداوە چن سالێ جارە یدووبارە بێوە . مەنەیۆ گەلی کوردی ئیزئیدیما تا ئارۆ جە داستانەکا شێخی عەبدی و هەزاران کەسایەتییە ئازێ کە نامێشا نمەزانمێ ینەکمشۆم بزانمێ .

بەلام جە دماو فەرمانی ٧٣ مین ئیتر تاریخ بە دەسوو ژەنا و جوانا ئیزئیدی منویسیۆوە ، ئیتر گیانسەردەسا راو ئازادی نە وێنەکێشا  ، نە نامێشا فۆتیا ، چیڵوای کەشەکا شەنگاڵی پسۆ قەلێوە ئاسنینی ، بە ئیرادەو ژەنا و جوانا نە تەنیا ئیزئید خانی و مەلەک تاووسی پارێزنا ، جە ئارۆوە بە مەرزنارەو سیستموو وێراوەبەری و رێک وستەو وێشا هیواو و دمارۆ نەتەوەێوە پسۆ کوردی پارێزنا . پسۆ پلاتفۆرموو هۆرام-ی سەرەراو هام بەش بیەی چەنی گردوو ئا ئازارا و کارەساتا کە سەروو واڵە و براڵەی ئیزئیدیمارە ئۆمان ، تەجرۆبەو وێراوەبەریشا پسۆ مەدرەسێوە پێ رێکوستەو و پارێزناو وێما جە وەرانوەروو گردوو ئا هێزا کە گەرکشانە شناسنامە و بیەیما تاوناوە بە کار مارمێ . هەر پاسە جە چوارچۆ نەتەوەو دیموکراتیکینە ، پالپەشتی جە گردوو نەتەوەکەیما و نیشتمانەکەیما کەرمێ بە گردوو تایبەتمەندی و جیاوازیەکاشاوە .

راوەبەری پلاتفۆرموو هۆرام-ی ٢/٨/٢٠١٧