پەکەکەی مشناسی ؟؟؟  بە بۆنەو ٣٨ هۆمین سالرۆ ئەرەمەرزنارەو پەکەکەی .

پەکەکەی مشناسی ؟؟؟ بە بۆنەو ٣٨ هۆمین سالرۆ ئەرەمەرزنارەو پەکەکەی .

پەکەکەی مشناسی ؟؟؟

پەکەکە تەنیا بە ماناو حزبێ نیا کە جە روێ پسۆ ١١/٢٧ /١٩٧٨  جە دەگاو فیسی سەر بە شاروو ئامەدی مەرزیابۆرە .  پەکەکە ئا ئاخێزەنە  کە دماو ٢٧ سەروردایا جیای ئانەی کە دەس پێ  چەکی بەرۆ ، دەسش وست سەروو ئا یاگێ کە نەیارا کوردستانی بە بێ ئانەی کەسێ پەنەش بزانۆ داگیرشا کەردەبێ ، ئا یاگێ ، یاگێ نەبێ جگە جە مەژگ و ویروو تاکوو کوردی ، پەکەکە بە ئازادی ویر و ئاوەزی جە راو پەنەیاونایۆ دەسش بە ئاخێزی کەرد . رابەر ئۆجەلان بە ٣ واتیڵە کە  ( کوردستان داگیرکریەوە نێو دۆلەتین )، یۆهەمین هەنگامەو ئازادی کورد و کوردستانیش دەس پەنە کەردە . وەلێ پەکەکەینە هەرچنە ئاخێزێ کوردی ئامێنێ و سەرشا هۆردان ، نەتاوانشا مەرزە جۆغرافیەکا وێشا بەزنا ،پەوکای تەنیا جەختشا سەروو مەردموو ئا یاگێ کەردەنۆ کە وێشا وجودشا بیەن .   

وەلێ پەکەکەینە دۆژمنا کوردی فرەو شۆرشەکاشا بە ئاسانی جە بیەنەنە بەردێنێ یا بە جە قەنارەداو سەرکردەکا کوردی لێرەو خەلکیشا ماڕانوو و تەسلیمێ ئیرادەو وێشا کەردێنێ . پێ نموونەی جە دماو قەنارەداو شێخ سەعید ، سمکۆ ، قازی محمد و فرە جە سەرکردەکا تەروو کوردستانی شۆرشەکەشا پێ ماوێوە فرە کپ کریان . داگیرکەرا و نەیارا کوردی تەنیا بە چەک یاری کوردیشا دان ، جە سیاسەتەنە دەسشا چەنە ور گێرتەن و پسۆ کارتی سیاسی بە کاردشا ئردێنێ . پەوکەی دماو خەباتێ دورو درێژ جە پانیشتەنە راشا بە چن لایانێ پسۆ پارتی و یەکیەتی دا کە سەروو سیستموو فیزیکی  کلاسیکیانە کیانێ سەروو ئاساسوو هێزی چەکداری مەرزنارە ، ئەساسێە کە کۆنترۆلکەردەیش جە گرد وەختێنە ئاسان بۆ . هەر هەنگامێ ئا لایانا کە جە قازانجوو نەیارا کوردستانی یا زڵهێزەکا جیهانی نەبۆ جە کەمتەرین وەختەنە بە دلوو وێشا ورشا سوورنا . پێ نموونەی چن سالێن لایانێ پانیشتوو کوردستانی بە نامێ دولەتی کوردیوە خۆلە چەموو گەلوو کوردی جە کەرا ، بەلام دماجار سەروو فشاروو تارنی و بەغذای و ئامریکای دەنگوو دولەتە کوردیەکەو بارزانی نەمەن . چوون ئا لایانێ پێ بەرژەوەندی داگیرکەرا حۆکمشا پەنە دریان نە خزمەتوو گەل و نیشتمانی .

دماو ئی پێشەکییە ، پرسیار مێذ وەرۆ ، کە پەکەکە چەنی درووس بی ؟

ویەردەو نەتەوەکەیما ئانەبێ کە زاناما ، پۆکای درووس بیەی یا بەرکەوتەو بزافێ پسۆ پەکەکەی پێ گەلەکەیما پسۆ زەروورەتێ حەتمی بی ، گەلێ کە جە تورکیەنە بە ( مەردە ) نامێش لوێبێ ، دورانێ کە کورد بیەی شەرم بێ و وەختێ کەسێ واتێش من کوردەنا ، تورکەکێ حتا چەپەکێ تورکیەیچ پسۆ سووکایەتی  پەنەش واچێنێ تو مەردەنی ، ئاستوو فاشیستوو تورکیەی بە یاگێ یاوابێ کە نەبیەو نەتەوەیوە پسۆ کوردیش کەردەبێ بە راسی و فرەو کوردایچ دەسشا جە کورد بیەو وێشا شۆرتەبێ ، پۆچی دماو ٣٨ سالا کورد بە پەنەیوانیش سەروو فکروو ئۆجەلانیوەو رێکوزیایەکا پەکەکەی ، نە ئانە کە بی بە هێزێ هەرێمی ئارۆ جە جیهانیچەنە بیەن بە یاگێ ئۆمێدی پێ ئازادی گردوو گەلە چێردەسەکا ، هەر پاسە ئا ژەنا کە جە لاو دەسەلاتەکاوە ئینکار کریا و زۆلمشا سەر کریۆ .

یوهۆمین جیاوازی پەکەکەی بنەڕەتوو پەکەکەیا کە  سەروو ئەساسوو ( فکر و هزری ئازاد  ) دور جە لایانی فیزیکی و چەکداری بە بنەما گێرتەی ئازادی ژەنێ بۆنیاد نریان ، کورد و حزبەکێش بە بۆنەو حەرەکەتوو کلاسیکی و دژە ژەنێ ، نیمەو کۆمەڵگاو وێشا پێ داگیرکەرا جە بیەی وستەبێ ، پەکەکە بە زینە کەردەیۆ و هێزدای بە لاوازیەکا نەتەوەو کوردی دەسش بە شۆرش کەرد .  چوونکە دولەت  بێ بە شێوازوو کۆنو حەرەکەتەکا تەری فرە ئاشنا ، بە جۆرێ کە بە ئاسانی تاوێ کۆنترۆل و تەسفیەشا کەرۆ ، پۆچی تا ئارۆ پەکەکە تەسفیە نەبیەن و تەسلیم بیەیش رەد کەردەنەوە چوونکە بنەرەتوو پەکەکەی بنەرەتێ زانستی و فکریا . مدرامانوو کادرا پەکەکەی و لایانەکا تەروو سەر بە فەلسەفەو رابەر ئۆجەلانی جە زینانەکا دولەتا تورکیەی و ئێرانی خاستەرین بەڵگەن پێ ئانەی کە یاومێنە پەکەکە شۆرشێن بە   قوولائیی داگیرکەری کوردستانی و  چێردەسەیی ئینسانیەتی .

دووهەم جیاوازی پەکەکەی بازنەو فکری پەکەکەیا ، پەکەکە وێش تەنیا بە ئازادیوازا کوردیوە لکە نەذان ، جە دلێ ویروو پەکەکەینە ئینسانیەت ئینا وەلێ گرد چێوەینە ، گەر تەماشەو راوەبەری پەکەکەی کەرمێ جە نەتەوەکا پسۆ تورکی بەشدارێ بیەنێ ، یا ئیسە جە کۆما جڤاکێن کوردستان کورد ، فارس ، عەرەب ، ئازەری ، تورک و ئەرمەنی بیەیشا هەن . پەکەکە حزبێ نەتەوەیی کلاسیک نیا ، فەرهەنگێن پێ یاوای بە ئازادی و ئاشتی . ئیسەیچ حزبێ کوردییەما هەنێ ، کە جە هەرێموو وێشا زیاتەر کەسی بە کورد مەنیارە ، یا کوردە ئیزئیدیەکا یا شێعەکا بە کوردێ نمەزانا .پەکەکە ئا باخەنە کە گرد گۆلێ بە رەنگوو وێش چەنەش سۆز بۆ . 

چوارەم جیاوازی پەکەکەی ، پەنەیاونا یا پەروەردەو تاکەکان ، پەکەکە جیاوازتەر جە لایانەکا تەری وەلێنە تاکەکێش پەنە یاونێ ئا وەختە حزبش مەزنارە ، هەر پاسە درۆشمەو چالاکی چالاکی چالاکی  حزبە کلاسیکەکاش واڕا بە  پەنەیاونای ، رێکوستەی و ئا وەختە چالاکی ، هەر کادرێ پەکەکەی پەروەردە نەوینۆ ، نمەتاوۆ پێشەنگی یا شکۆداری پەکەکەی کەرۆ ، بۆنەو ئانەیە پەنە یاونای بەشێوە ئەسلی جە پەکەکەین کە روانە تازە بیەیش پۆوە دیارا .

جیاوازی پەنجەم و پەکەکەی جیاوازی جە سیستموو راوەبەرینە بەر گنۆ ، پەکەکە جە جیهانەنە پێ یۆهومین جاری سیستموو هام سەرۆکایەتی ( ژەن و پیایش ) رێک وستوو ئیسە جە گردوو بەشەکا کوردستانینە ، بە پراکتیک وینمێش ، جە هیچ یاگەنە ئنەو ریکوزیایەکا فەلسەفەو رابەر ئۆجەلانی ژەنی نەتاوانش بەشدارەو راوەبەری ئازادەو وێش بۆ ،  ئا فکرە کە رابەر ئۆجەلان ماچۆ تا ژەنی ئازادە نەبۆ کۆمەڵگا ئازاد نمەبۆ ، جە رۆژئاوانە ئا راسییە زیاتەر بەر کەوت .یا کۆنگرەو پەنجەموو پژاکی کە ژەن و پیا بە ٥٠ بە ٥٠ بەشدارێ کۆنگرەی بییە ، پێ یوهەم جاریا کە جە جیهانەنە ژن و پیا بە یەکسان بەشدارێ با .   

جیاوازی ششەم و پەکەکەی ، لایانە فرە هەستیارا ، ئاییچ بواروو رەخنە گێرتەیۆ رەخنەدایا وەرانوەروو یۆترینینە ، کەلتوورێ کە هیچ ئەندامێ پەکەکە چەنەش بەڕی نیا ، پسۆ رابەر ئۆجەلانی ماچۆ هەر یاگێ ڕەخنە و رەخنە دایش چەنە نەبۆ پەکەکە چاگە بیەیش نیا ،  چوونکە رەخنە گێرتەی وێ بە گۆرە بیەو ئینسانەکا ماڕۆ و ملاوە وێشارە ، نە پسۆ وەرەپرسەکا حزبە کلاسیکەکا کە نەبیەو رەخنە گێرتەی پاسەش کەردەن کە وێشا سەروو گەلیرە بە زل زانا . بەلام پەکەکە ئی دیوارەشە و پیرۆز کەردەو سەرکردە رەنجوەرەکا میللەتیش ماڕا ، رەخنەگێرتەی دلێ پەکەکەینە پاسەش کەردەن کە قۆمایەتی و گرووپ چیەتی نەمەنۆ و گرد ئەندامێ پرنسیبەکا وەرچەما گێرۆ. بڕیار بە تاک نیا و مەجلس بڕیار گێرۆ ، تا هەلەکێ کەمتەرێ با و خەسارێ کە بۆ ، گرد پێوەرە گێراش ئەستۆ  .

جیاوازی حەوتەم و پەکەکەی ، کەردەیۆ بەرەو دیموکراسین رەو گەلەکەیشەرە ، تەنیا لایانێ کە سەنتەروو بڕیاریش جە گەلەکەیش ور گێرۆ ، وێش بە خزمەتکاروو گەلی مزانۆ و هەر ئینەیچ پاسەش کەردەن کە هێلە نەتەوەئیەکاش پێ قازانجوو حزبی بەکار نارۆ . پەشت بەستەی بە گەلی و بڕیار ورگێرتەی جە گەلی پاسەش کەردەن کە جە وەرانوەروو نەیاراوە تەسلیم نەبۆ .

جیاوازی هەشتەم و پەکەکەی : بە گەورە تەماشا کەردەو تاکوو کوردین بە بێ جیاوازی زمانی ، فەرهەنگی ، ئایینی و سیاسیسش ، بە جۆرە کە تەنیا چەترەو نەتەوەیش کەردێنە چەترەو ساباتوو گلێرە کەردەیۆ گردوو لایانەکا جە هەر چوار پارچەنە ، پاسە هەستوو نەتەوەیش بەرز کەردەنەوە کە جوانێ وەرکەوتی جە وەرنیشتەنە و جوانێ سەرنیشتی جە پانیشتەنە و هەر یۆ جە هەر یاگێ کە هێرشوو داگیر کەری بۆ گیانشا پێ وەڵاتیشا بەخت کەرا ، ئینە گەر راسی پەکەکەی نەبۆ کە کوردش پسۆ نەتەوەی رێک وستەنۆ ، نەتەوێوە کە چوارچێوەش دیموکراتیکا ، چێش تاوۆ راسی نەتەوەیی بیەو پەکەکەی نیشانە دۆ ؟

جیاوازی نۆیەم و پەکەکەی واڕاو کەلتوورو دیرینەو شکەستی پێ سەرکەوتەی و تەسلیم بیەی پێ مدرامانی  وەرانوەروو دۆژمناوە ، کەلتوورێ کە جە کۆبانێنە لێرەو بەرزوو تاکوو کوردیش وەرانوەروو داعشینە پسۆ یۆ جە درەندەتەرین نەیارا کوردی کە جە گرد لایەوە پەشتیوانی کریە نیشانە دا ، سەرکەوتەکا پەکەکەی دەمووچەمی راسینەو لایانە کلاسیکەکا کە بە بۆنەو قازانجوو تاک و حزبی وێشاوە جگە جە داستانەو شکەست دماو شکەستیشا جە ئاش بەتالەکەو ٣١ و ئابوو ١٩٧٥ ی  تا وەلێ کۆباینە پسۆ میراسێ سەروو میلەتەکەیمارە سەپنابێ ، جە ئەدەبیاتوو سیاسی کوردینە شۆرتەوە و ناستش.  

جیاوازی دەیەم و پەکەکەی : ئانەن کە تاواش هوشیاری گەلەکەیما جە سەرنیشتوو وەڵاتینە یاونۆ بە ئاستوو هوشیاری نەتەوەیی و گرد بە یەک دەنگ دژ بە ئاک پارتی بە رابەری ئەردۆغانی هاوار کەرا ، جە راو هەدەپەیۆ تاواش دەنگوو کوردی یاونۆ دلێ پارمانوو تورکیەی و بە جیهانیش نیشانەدا کە نەتەوەیوە تەر جە تورکیەنە ژیوۆ کە کوردا و بە دیموکراسی داواو مافەکا وێش کەرۆ . ئا زهنیەتە کە جە سەردەموو ئاتاتورکی تا ئارۆ بە کوردی ماچێنێ تورکی شاخاوی ماڕاش و بە کردەوە وێش بە جیهانیش نیشانەدا کە کورد گەلێوە رێک وستەن کە ساحێبوو رابەر و رێکوستەو وێشا .  

ئینە ئا خالێ بێنێ کە پەکەکە تاواش شەرەف و سەر مەشقێ بەوێش بەخشۆ پێناوو سەربەرزی  نەتەوەکەیما  جە تەماموو جیهانینە . با ئیسە بزانمێ پەکەکە چ وەختێنە خەریکوو فەراهم ئاردەو ئی دەسکەوتا بێ سەروو ئاستوو کوردستانی گەورەی ؟ چی پەکەکە هەر یاگێ کە هێرش بۆ پێ پارێزگاری ئامادەن ؟ 

جە سەردەموو عۆدال بیەی وەرەپەرسە حزبیەکا پانیشتوو کوردستانی پەی بە دەس ئاوردەو ژیوای شاهانە و کاسبی کەردەی بە ونەو شەهیدا نیشتمانی کە بەها بنەڕەتیەکێ وێشا بە تەلارێو و دۆلارێ واڕێوە و جیای واراو ژیوای خۆلکی ژیواو تاکە کەسی و خانەوادەکا وێشا بە چەپاوەلکەردەو سروەتوو سامانوو گەلەکەیما یاونا یاگێوە کە گەل و نیشتمانشا ویر شییۆ ، یا جە رۆژهەڵاتەنە بە ورچنیەو ژیواو کەمپنشینی هیواو گەلیشا جە رۆژهەڵاتەنە ناست ، جیای وەش کەردەو گۆزەرانوو هام نیشتمانیا، بیە بە بەشێ جە ئەجندەو داگیرکەرا کوردستانی جە پانیشتەنە و جە رۆژهەڵاتیچەنە تەسلیمێ واقعیەتوو رژیموو ئێرانی بییە ، وەختێ سەرکردەکێ پانیشتی قووتوو گەلە ئەنفالکریاکەیشا وستەنە سفرەو داگیرکەرا کوردستانی ، ئا وەختە بێ کە پەکەکە ئەرکەکەش جە پارچێوە بێ بە ئەرکوو چوار پارچا وساحێبداری جە هەر کوردێوە جە هەر یاگەنە کە هەن .  

ئینە ئا راسییەنێ کە مشۆم گرد تاکێوە کوردی بزانۆشا کە تەسلیم بە چەواشەکاری حزبە کلاسیکەکا نەبۆ و خۆلە نەکریۆ چەمێشا ،  کە بەردەوام تۆهمەتێ و تاوانێ بێ بنەمێ دوور جە راسی مذا پالوو پەکەکەی ؟  با جە وێما پەرسمێ کێ بێ ..

کێ بێ وەرمش جە چەماش توورنا جە قەندیلی سەختەنە ، دەسەو یەخە چەنی سرووشتی سەختی وەرانوەروو جبهەخانە وزڵهێزێ پسۆ ئەرتەشوو تورکیەی مدرامانش هۆرچنی ؟  

کێ بێ رۆحش کەرد جەستەو سەردوو نەتەوەکەیمارە وەختێنە ، حزبەکا تەری ناوەختشا کەردەبێ و ویری تەنگی حزبی وێشا سەپنێنێ ؟

کێ بێ درۆشمەو یا (کوردستان یا نەمان) یش وارا بە یا ئازادی یا ئازادی ، یا سەرکەتەی یا سەرکەتەی ، بە جۆرێ واتیلێ نمەبۆ ، نمەتاوۆ و مەبۆنەیش جە فەرهەنگوو نەتەوەیمانە پاکە کەردەوە  ؟

کێ بێ حەسابوو زڵهێزاش پووچەڵ کەردۆ ، وەختێ بە گێرتەو رابەرەکەیش رابەر ئۆجەلان واتشا ئیتر پەکەکە تاویاوە ؟  بێ گۆمان تەنیا پەکەکە بێ کە سەروو ئاستوو جیهانینە  دماو گیریاو رابەرەکەیش بە بۆنەو بیەو سیستمێ رێکوزیا وێش تازە و فراوانتەر کەرد و وەلێ کەوت .

کێ بێ ئا لایانە کە جیاواز جە لایانەکا تەری بە لێرێوە بەرز سەرەراو گردوو ئا نەیارا هەرێمی و جیهانیوە ، هەر جە یۆهەمین هەنگامەوە مەرزە دەسکردەکێش ورشانێوە و  نامێ داگیر کەراش نەوستە شوونەو نامەکێ وێش و نامێ وێش نیا پارتی کرێکارانی کوردستان ؟

مزاندێ پەکەکە تەنیا حزبێن کە ژیوگە پارێزنایش کەرد بە ئەسلێ جە خەباتیش ؟

مزاندێ تەنیا دلێ پەکەکەینە ژەنی ساحێبوو ئەرتەش ، رێک وزیا و دادگاو وێشانێ ؟ 

مزاندێ پەکەکە یۆهومین لایانی کوردی بێ کە وەشەویسی ئاژەڵا و نیشتمانی و گریلایش پێوەرە رێک وستێ ؟ 

ئەی خاسا مزاندێ تەنیا لایانێ کە دیوەخان و ئاغا و خانەوادە و رەعیەتش نیا تەنیا پەکەکەن ؟

مزاندێ جیاوازتەر جە لایانەکا تەری ، تەنیا پەکەکەن کە شەهیدا بە رابەرو راسینەو وەڵاتی و نیشتمانی مزانۆ ؟

مزاندێ تەنیا لایانێ کە پێوانەو پلێ سەرکردەکاش تەنیا خزمەتوو و ئەرک گێرتەین تەنیا پەکەکەن ؟

مزاندێ تەنیا لایانە کە رێز جە گرد ویرو باورێ و ئایینزاکا گێرۆ بە بێ تەرس پەکەکە ؟

مزاندێ تەنیا لایانێ کە وەشەویستەرین چێو لاشۆ جە گرد بەها مادییەکا تەری گەل و نیشتمانا ، پەکەکەن ؟

مزاندێ تەنیا لایانێ کە جە هەر چوارپارچەو کوردستانی و ئازادیوازا تەرو گەلا جیهانی شەهیدێش هەنێ پەکەکەن ؟

مزاندێ تەنیا لایانێ کە گردوو بەشە جیاوازەکا نەتەوەکەیما بە شناسنامەو وێشاوە زینە کەردێوە تەنیا پەکەکەن ؟

مزاندێ پەکەکە تەنیا لایانێوەن کە سەرو پەیا وێش مدراو و وێش رێک وست ،  دوور جە هەمکاری ورگێرتەی زەری جە وەڵاتا ، بە جۆرێ جەمیل بایک ماچۆ ، وەختێ گێلایمێ وەڵات  جە گازی عەنتاب یەکەم جار پێ مەێذانوو هەرمانکارا پەرساما ، پێ ئانەی بە رەنجوو شانا وێما شۆرش بەرمێ راوە ، نە دەس پانکەردەیۆ پێ خۆلکی . ئینە تەزکیە نیا پەی بزووتنەوێ پسۆ پەکەکەی ، بە پێچەوانەوە گەواهی دایا پێ مێژووی  کە جە تاریکی شەوە زەنگەو کۆیلایەتی و وێ رادەسکەردەی لایەنەکا تەری بە دۆژمنا لایانێ پسۆ پەکەکەی تاواش ،بۆ بە یاگێ هیوا و  فێرگە و ئاکادیمیاو نەتەوەکەیما چێرو درۆشمەو ( مدرامان ژیوایا ) .

سەرکەوتەی پێ ئیرادەو گەلەکەیما

کامەران گۆڵپی